Вести
ОН побара 71 милион долари помош за Киргистан
види ги сите денешни вести
Британски трупи ќе добијат задача да доставуваат помош во Газа, пишува Би-Би-Си
Британските трупи најверојатно ќе добијат задача да доставуваат помош во Газа преку морско пристаниште што сега се гради од страна на САД, објави Би-Би-Си во саботата, 27 април, пренесува АП.
Според пишувањата на Би-Би-Си, британската влада размислува да распореди војници кои ќе ги возат камионите што ќе носат помош од пристаништето до брегот.
Сепак, Би-Би-Си објави и дека конечна одлука по ова прашање не е донесена и предлогот се уште не е пристигнат до британскиот премиер Риши Сунак.
Овие информации доаѓаат откако висок американски воен функционер во четвртокот рече дека нема да има американски „чизми на теренот“ и дека друга нација ќе обезбеди персонал за возење на камионите за испорака на помош до брегот.
Инаку, токму Велика Британија е таа која што веќе обезбедува логистичка поддршка за изградбата на пристаништето, вклучително и брод на Кралската морнарица во кој ќе бидат сместени стотици војници и морнари кои работат на проектот.
Покрај тоа, британските воени планери се дел од Централната команда на САД во Флорида и во Кипар, каде што помошта ќе биде проверена пред да се испорача во Газа.
Хидрографската канцеларија на Обединетото Кралство исто така сподели своја анализа за тоа како можат да помогнат во изградбата на пристаништето.
„Многу е важно да воспоставиме повеќе правци за испраќање витална хуманитарна помош до жителите на Газа. Обединетото Кралство и нашите меѓународни сојузници продолжуваат да ја преземаат водечката улога во обезбедувањето помош за Газа“, се вели во изјавата на министерот за одбрана Грант Шапс.
Изградбата на пристаништето во Газа за полесен пристап до хуманитарна помош, доаѓа во време кога Израел се соочува со меѓународни критики за бавна испорака на помош на палестинската територија, за која Велика Британија тврди дека најмалку една четвртина од населението се наоѓа на работ на глад.
Војната меѓу Израел и Хамас, организација означена како терористичка и од ЕУ и од САД, започна со нападот на Хамас во Јужен Израел на 7 октомври минатата година кога милитантите убија 1.200 луѓе, главно цивили, а притоа и зедоа 250 лица како заложници.
Москва национализираше руска филијала на италијанска фирма која произведува опрема за греење
Италија во саботата го повика рускиот амбасадор во земјата на разговори, откако Москва објави дека Аристон Термо Груп, филијала на италијанска компанија која произведува опрема за греење, ќе биде ставена под „привремено управување“ на државниот енергетски гигант Газпром, пренесува АФП.
„Владата бара појаснување за прашањето за национализацијата на Аристон Термо групацијата“, напиша италијанскиот министер за надворешни работи Антонио Тајани на социјалната мрежа X, порано позната како Твитер, на 27 април.
Тој рече дека побарал од висок функционер во италијанското Министерство за надворешни работи да го покани рускиот амбасадор Алексеј Парамонов на интервју.
„Ние работиме и со Брисел, во соработка со Германија откако Бош исто така беше цел на нападот“, рече Тајани.
Во друга објава, Тајани посочи дека разговарал со врвните менаџери на Аристон, додавајќи дека Рим „стои покрај компаниите и е подготвен да ги заштити на сите меѓународни пазари“.
Национализацијата на Аристон беше објавена во рускиот декрет објавен во петокот и потпишан од рускиот претседател Владимир Путин.
Уредбата ја пренесува контролата над 100 отсто од руските компании на Аристон - Аристон Термо Рус, во сопственост на Аристон Холдинг НВ и БШХ Холдинг Алианс, во сопственост на БШ Хаусгерат ГмбХ - на Газпром Холд Системс, подружница на Газпром.
Откако ја нападна Украина, Москва ги презеде руските подружници на голем број западни компании - на пример францускиот производител на јогурт Данон и данскиот производител на пиво Карлсберг - под, како што во Русија ја нарекуваат „привремена контрола на управување“.
Кремљ ги опиша овие потези како одговор на западните санкции против руските компании. Западните власти и некои од компаниите ја осудија руската национализација на приватната сопственост.
Гир: Изборите поминаа во мирна и демократска атмосфера, се надеваме дека ќе биде така и во вториот круг
Евроамбасадорот во земјава Дејвид Гир, денеска, 27 април, одговарајќи на новинарско прашање рече дека првиот круг од претседателските избори во Северна Македонија одржани на 24 април генерално поминале во фер и демократска атмосфера.
„Се надеваме дека така ќе биде и за време на камапањата вториот круг од претседателските избори и за параламентарните избори и дека целиот процес ќе заврши со позитивни пораки“, изјави евроамбасадорот Гир, кој денеска присуствуваше на одбележувањето на Европската недела на имунизација во Градски парк во Скопје.
Гир изрази надеж дека на сличен начин ќе поминат и изборите кои ќе се одржат на 8 мај.
„Мисијата на ОБСЕ/ОДИХР веќе го издаде прелиминарниот извештај од Првиот круг на изборите. Изборите се одвиваа во генерално мирна и демократска атмосфера и навистина се надеваме дека во вториот круг на претседателските избори, тие исто така и во кампањата за парламентарните избори тие ќе се надградат во овој позитивен правец што ќе овозможи целиот процес да заврши со позитивни пораки и со позитивно чувство“, истакна Гир.
Во вториот круг претседателски избори на 8 мај ќе се кандидатиет кои освоија најмногу гласови на 24 април - професорката Гордана Сиљановска-Давкова со 363.086 гласови и Стево Пендаровски со 180.500 гласови.
Покрај втор круг претседателски, на 8 мај граѓаните паралелно ќе гласаат и на парламентарните избори. Излезноста на овие избори беше поголема од таа во првиот круг пред пет години.
Во првиот круг од претседателските избори право на глас имаа 1.814.317 граѓани, а се гласаше на 3.508 избирачки места.
Невреме ширум САД, торнада уриваат куќи и згради во Небраска и Ајова
Торнада направија хаос во американскиот среден запад во петокот, предизвикувајќи уривање на зграда со десетици луѓе внатре, а уништени и оштетени се уште стотици домови во близина на градот Омаха, во Небраска.
Од петокот вечерта имаше неколку извештаи за повредени, но нема извештаи за загинати лица од невремето. Предупредувањата за торнадо продолжија да се издаваат во текот на ноќта во другата соседна американска држава Ајова, пренесе АП.
Три лица се повредени во округот Ланкастер, Небраска кога торнадо удри и урна индустриска зграда со 70 луѓе внатре. Неколкумина лица биле заробени, но сите се успешно евакуирани, соопштија властите.
Едно од најразорните торнада во петокот се движеше со милји низ претежно руралните земјоделски области пред да ги уништи домовите и другите згради во предградието на Омаха, град со 485.000 жители и околу еден милион во пошироката метрополитенска област.
Фотографиите на социјалните мрежи покажаа дека и малиот град Минден, Ајова, на педесетина километри североисточно од Омаха, претрпел голема штета.
Прогнозата за сабота е застрашувачка, пишува АП. Националната метеоролошка служба издаде предупредувања за торнадо во делови од Ајова, Канзас, Мисури, Оклахома и Тексас. Синоптичарите предупредија дека се можни големи налети на град и силен ветер.
„Изгледа дека утре ќе има нов голем шок. Можеби малку подалеку на југ“, рече Беки Керн, метеоролог во канцеларијата на Националната метеоролошка служба во Омаха.
„Стотици домови беа оштетени во петокот во Омаха, најмногу во областа Елхорн на западната страна на градот“, рече поручникот Нил Боначи од полицијата во Омаха, додавајќи дека многу домови се уништени или сериозно оштетени.
Шефот на противпожарната служба на Омаха, Кети Босман, рече дека полицијата и пожарникарите оделе од врата до врата за да им помогнат на луѓето, одејќи во „најтешко погодената област“.
Во една област на Елхорн биле оштетени десетици новоизградени големи куќи, каде биле испратени и десетици возила на итната помош.
„Можевме да го слушнеме торнадото што доаѓа. Наеднаш нашата ограда ја снема и погледнавме на северозапад - целото соседство го нема“, рече Пат Вудс, кој живее во Елхорн.
Во петокот попладне беше издадено предупредување за торнадо во областа Омаха, токму кога децата требаше да бидат пуштени од училиште. Многу училишта имаа засолништа за ученици додека не помине невремето. Неколку часа подоцна, автобусите сè уште ги носеа децата дома.
Друго торнадо ја погоди областа на источниот раб на Омаха, минувајќи директно низ делови од аеродромот Епли, кој се наоѓа во самиот град. Откако поминал низ аеродромот, торнадото ја преминало реката Мисури и влегло во Ајова, северно од Советот Блафс.
Портпаролката на Агенцијата за управување со вонредни состојби во Небраска, Катрина Сперл, во петокот попладне изјави дека извештаите за штетата штотуку почнуваат да се појавуваат.
Во округот Ланкастер, каде што три лица беа повредени при уривање на индустриска зграда, полициските службеници исто така рекоа дека имале извештаи за превртен воз во близина на Вејверли, Небраска.
Локалното претпријатие за електрична енергија, Омаха Пауер Дистрикт, објави дека речиси 10.000 корисници се без струја во областа Омаха.
Гувернерот на Небраска, Џим Пилен, на социјалната мрежа Х соопшти дека наредил државните ресурси да се стават на располагање за да помогнат во одговорот и поддршката за итни случаи додека тие вршат детална проценка на направената штета.
МВР ја промовираше новата генерација полициски службеници
Во Центарот за обука во Идризово денеска, 27 април, се одржа свечена промоција на која беа промовирани нови полициски службеници од генерацијата 2023-2024 година. Според податоците на МВР, едногодишната обука ја завршиле 508 нови полицајци од кои 416 мажи и 92 жени.
Техничкиот премиер Талат Џафери честитајќи им на новите припадници на полицијата посочи дека да се биде на првата линија на безбедноста е благородно и во исто време многу одговорна должност.
Џафери ги охрабри полицајците посакувајќи им да бидат чесни и посветени во спроведувањето на должностите кон граѓаните и горди на својата работа, а им испрати и порака дека треба професионално да се справуваат со новите предизвици на работата.
„За професионалниот полицаец, нема помалку или повеќе важна задача. Сите граѓани се еднакво исти пред законот и имаат еднакво исто право на безбедност. Како идни полициски службеници, очекувам преку сопственото поведение и труд да покажете дека, полицијата како институција е професионална, и успешно ги остварува своите законски надлежности и задачи“, рече Џафери.
Министерот за внатрешни работи Панче Тошковски истакна дека полицајците ги очекува една нова етапа.
„Најпрво би ви порачал секојпат да имате на ум дека секој еден од вас е креатор на сопствената среќа. Вашиот успех зависи само од вас. Вашиот успех треба да заврши само од вашата стручниост, кооперативност, добра волја“, истакна Тошковски.
Дополнителниот заменик министер за внатрешни работи Митко Бојмацалиев им честиташе успешното завршување на обуката за полициски службеници, потсетувајќи на се што претходно е направено во полицијата, меѓу другото, и на реконструкцијата на Центарот за обука во Идризово.
На свеченоста беа соопштение и имињата на најдобрите полициски службеници.
Палестинските спортисти ќе бидат дел од Олимпијадата во Париз дури и ако не се квалификуваат
Шест до осум палестински спортисти се очекува да се натпреваруваат на Олимписките игри во Париз, а некои ќе бидат поканети од Меѓународниот олимписки комитет (МОК) дури и ако не се квалификуваат, најави шефот на МОК, Томас Бах.
Бах изјави за АФП дека МОК „јасно се обврзал“ за тоа дека Палестинците ќе бидат поканети дури и ако не се квалификуваат за игрите, кои започнуваат на 26 јули.
Тој вети дека церемонијата на отворањето на игрите во Париз на реката Сена ќе биде „незаборавна“, и покрај постојаната загриженост за безбедноста на речната парада на отворено.
„Крајно професионалниот пристап на француските власти ја зајакнува довербата дека можеме да ја одржиме оваа церемонија на отворање на Сена и дека оваа церемонија на отворање ќе биде незаборавна за спортистите и сите ќе бидат безбедни“, порача Бах во ексклузивно интервју за АФП во седиштето на МОК во Лозана, Швајцарија во петокот, 26 април.
Огромно амбициозната церемонија за отворање закажана за 26 јули останува една од најголемите загатки околу Олимпијадата во Париз.
Наместо традиционалната парада на атлетскиот стадион, тимовите ќе пловат по реката Сена во чамци пред околу 500.000 гледачи, меѓу кои и луѓе кои ќе гледаат од околните згради.
Постојано се шпекулира дека француските власти ќе мора да ја поместат или прилагодат церемонијата поради безбедносни закани, по нападот на концертната сала во Москва во март, за кој одговорност презеде огранок на терористичката група, т.н. Исламска држава, што предизвикува дополнителни стравувања.
Францускиот претседател Емануел Макрон минатата недела изјави дека отворањето би можело да биде преместено на националниот стадион, Стад де Франс, иако локалните организатори секогаш инсистираа дека тоа не е опција.
„Сите се решени да ја одржат оваа церемонија на отворање на Сена, а во исто време да ги разгледаат сите различни сценарија“, објасни Бах.
Бах рече дека смета на враќање на гледачите во Париз во 2024 година за да го „оживее олимпискиот дух“ откако последните Игри во Токио, погодени од пандемијата со коронавирусот, се одржаа на празни стадиони.
„Две нарушени изданија би значеле дека Олимписките игри и олимписките вредности ќе исчезнат на цели осум години. Осум години се премногу и тогаш би било многу тешко да се оживее олимпискиот дух“, рече тој.
Запрашан за расположението во Франција и критиките за игрите таму, тој рече дека тоа делумно се должи на глобалната неизвесност.
„Тоа не е поврзано само со Олимпијадата. Тоа е дел од нашиот жар затоа што живееме во несигурни времиња. Има луѓе кои се скептични. Некои се дури и исплашени, а некои се загрижени за својата иднина“, рече Бах.
Јеменските Хути оштетија танкер со нафта „поврзан со Русија“
Балистичките проектили истрелани од јеменските бунтовници Хути предизвикале „мали штети“ на танкер со нафта под панамско знаме кој пловел низ Црвеното Море во петокот, објави АП.
Во нападот, бунтовниците истрелале три проектили, од кои едната го оштетила бродот Андромеда Стар со знамето на Панама и регистриран на Сејшелите, соопшти Централната команда на американската армија.
Приватната безбедносна компанија Амбри информираше дека танкерот бил „вклучен во трговија поврзана со Русија“. Бродот патувал од Приморск, Русија до Вадинар, Индија, соопштија од Амбри.
Портпаролот на силите на Хутите, Јахја Сара, ја презеде одговорноста за нападот рано во саботата во претходно снимена изјава што ја објавија бунтовниците. Тој изјави дека танкерот бил „директно погоден“.
Во моментот на нападот во близина се наоѓал и друг брод, „Мајша“ под знамето на Антигва и Барбуда, управуван од Либерија, соопштија САД. Нападот се случил во близина на градот Мока во Јемен, во близина на теснецот Баб ел-Мандеб, кој го поврзува Црвеното Море со Аденскиот Залив.
Нападот следуваше по зголемените напади што ги започнаа Хутите во последните денови по релативното затишје во нивната повеќемесечна кампања против израелската војна во Појасот Газа против Хамас, кој, меѓу другото, САД и Европската унија го прогласија за терористички организација.
Хутите извршија повеќе од 50 напади врз бродови од ноември, при што зазедоа еден брод и потонаа друг, според американската поморска управа.
Нападите на Хутите се намалени во последните недели бидејќи бунтовниците беа цел на воздушни напади предводени од САД. Испораката преку Црвеното Море и Аденскиот Залив е намалена поради заканата.
Американските власти соопштија дека на бунтовниците можеби им снемува оружје како резултат на кампањата предводена од САД против нив, како и по честите лансирања на беспилотни летала и проектили во последните месеци.
Сепак, има уште најмалку два напади за кои одговорноста ја преземаат Хутите од средата. Прв на мета беше MV Yorktown, брод со американско знаме. Друга цел беше MSC Darwin.
Хутите истакнаа дека ќе продолжат со нападите додека Израел не ја заврши војната во Газа, во која загинаа повеќе од 34.000 Палестинци, според податоците објавени од Хамас.
Војната во Газа избувна откако милитантите предводени од Хамас го нападнаа Израел на 7 ноември 2023 година, убивајќи 1.200 луѓе, а околу 250 лица беа земени за заложници.
Повеќето од бродовите цел на Хутите имале мала или никаква директна врска со Израел, САД или други нации. Бунтовниците истрелаа проектили кон Израел, иако повеќето беа пресретнати.
ССМ преку отворено писмо ги повика работниците да се приклучат на првомајскиот протест
Претседателот на Сојузот на синдикати на Македонија (ССМ), Слободан Трендафилов, денеска, 27 мај, преку отворено писмо до јавноста посочува дека работничкото движење во Македонија е исправено пред сериозен предизвик поради, како што наведува, односот на креаторите на политиките, за кои тврди дека „се грижат строго за себе, а не и за работничките права и интереси“.
„Денеска, работниците во Македонија се соочуваат со се поголем притисок за нивната егзистенција поради високите трошоци за живот и ниските плати. Синдикатите покажаа дека можат напорно да работат во интерес на нивните членови и во интерес на работниците. Синдикатите покажаа дека секој сам може да постигне резултат, но имаме можност сплотени да покажеме одлучност во работничката борба, онака како што вашите и нашите членови очекуваат и онака како што работниците очекуваат од нас“, наведува тој во писмото повикувајќи го членството на протест.
Трендафилов посочува дека на 1 мај работниците имаат можност и шанса да покажат дека се незадоволни и дека сите тие кои претендираат да ја водат државата треба да го слушнат гласот на работниците.
„Имаме можност да го покажеме нашето, работничкото незадоволство и заедно да излеземе на голем работнички протест на 1 Мај, особено поради можноста, пораките, нашите и работничките барања да ги упатиме на неколку денови пред парламентарните избори до сите тие кои претендираат да ја водат Државата. Како Претседател на Сојузот на синдикатите на Македонија ве замолувам да покажеме одлучност во борбата, борбата која е заедничка, за подобро утре и за подобри работнички права“, наведува Трендафилов.
На протестот очекува на ССМ да му се придружат и членови на други синдикати и граѓани. На Меѓународниот ден на трудот - 1 Мај, протестот ќе започне во 11 часот од пред Работничкиот дом до Собрание - Стопанска комора - Влада.
Кина испрати воени авиони кон Тајван откако американскиот државен секретар го напушти Пекинг
Тајван извести за обновени кинески воени активности во близина на островот во саботата, откако 12 авиони ја прелетаа чувствителната централна линија на Тајванскиот теснец, еден ден по завршувањето на посетата на Кина од страна на американскиот државен секретар Антони Блинкен.
САД се најважниот меѓународен поддржувач и снабдувач со оружје на Тајван и покрај недостатокот на формални дипломатски врски. Блинкен рече дека ја истакнал „критичната важност“ на одржувањето на мирот и стабилноста меѓу теснецот додека е во Кина.
Демократскиот Тајван се соочи со зголемен воен притисок од Кина, која го гледа островот како своја територија. Тајванската влада го отфрла ова.
Тајванското Министерство за одбрана соопшти дека открило 22 кинески воени авиони, вклучително и ловци Су-30, до 9:30 часот (сабота, 1:30 часот по средноевропско време), од кои 12 ја преминале средната линија кон северен и централен Тајван.
Линијата некогаш служела како неофицијална граница меѓу двете страни што ниту една војска не ја преминала, но кинеската авијација сега редовно испраќа авиони над неа. Кина не го признава постоењето на линијата.
Тајванското Министерство за одбрана соопшти дека авионите биле ангажирани во „заеднички патроли за борбена готовност“ со кинески воени бродови, додавајќи дека тајванските авиони и бродови одговориле „соодветно“. Министерството сепак не даде повеќе детали.
Кинеското Министерство за одбрана не одговори на повиците на Ројтерс во саботата.
Вооружените сили на Тајван се добро опремени и обучени во споредба со кинеските, особено морнарицата и воздухопловните сили, кои речиси секојдневно реагираат на кинеските мисии.
Кина го смета Тајван како најважното прашање во нејзините односи со САД, а Пекинг постојано бара Вашингтон да ја прекине продажбата на оружје на Тајван.
Новоизбраниот претседател на Тајван Лаи Чинг-те ја презема функцијата на 20 мај, откако победи на изборите во јануари. Пекинг го смета за „опасен сепаратист“ и ги отфрли неговите постојани повици за разговори.
Лаи во четвртокот рече дека Кина треба да има доверба и да разговара со легално избраната влада на Тајван. Како и претседателката во заминување Цаи Инг-вен, Лаи вели дека само народот на Тајван може да одлучи за својата иднина.
Русија сериозно оштети четири украински термоелектрани
Русија изврши „масовен“ ракетен напад врз Украина, погодувајќи енергетски објекти и оштетувајќи електрани во неколку региони во текот на ноќта во саботата (27 април), соопштија властите во Киев.
Москва ги засили нападите врз електричната инфраструктура на Украина во текот на последниве месеци, предизвикувајќи прекини на струја во повеќе делови од земјата и ја натера Украина да побара од граѓаните да ја намалат потрошувачката.
„Руските вооружени сили извршија уште еден голем ракетен напад врз Украина“, објави украинската војска во редовниот утрински извештај на 27 април.
„Непријателот повторно ја нападна енергетската инфраструктура на земјата. Поточно, беа нападнати објекти во регионите Дњепропетровск, Ивано-Франковск и Лавов. Опремата е оштетена“, напиша министерот за енергетика Герман Галушченко во објава на Фејсбук.
Украинската компанија за електрична енергија ДТЕК соопшти дека опремата на четири термоелектрани била „сериозно оштетена“ во нападите.
Украинските воздухопловни сили соопштија дека Москва истрелала 34 проектили, од кои 21 биле соборени.
„Две лица се повредени во централниот град Кривји Рих“, напиша на Телеграм Олександр Вилкул, претседател на градскиот совет.
Лидерот на западниот регион Лавов во Украина ги повика жителите да не користат енергетски интензивни апарати, вклучувајќи котлиња, пегли, машини за перење и микробранови печки во периодот помеѓу 19:00 и 22:00 часот, со цел да се заштедат ограничените резерви на енергија.
„Тешко е енергетскиот систем да го одржи балансот на производство и потрошувачка“, вели Максим Козицки во објава на Телеграм.
Москва, од друга страна, соопшти дека Украина во текот на ноќта во петокот извршила еден од најголемите обиди за напади со беспилотни летала против јужниот регион Краснодар и анектираниот полуостров Крим.
Руското министерството за одбрана соопшти дека нејзината воздушна одбрана „уништила 66 украински беспилотни летала над регионот Краснодар, а уште две беспилотни летала се уништени над полуостровот Крим“.
Руската војска редовно ги напаѓа украинските региони со различни видови оружје - беспилотни летала, ракети, противвоздушни ракети и противвоздушни ракети.
И покрај доказите и сведочењата, Москва негира дека целела цивили од почетокот на целосната инвазија во февруари 2022 година. Од март, мисијата за набљудување на човековите права на Обединетите Нации (ОН) потврди дека се загинати 10.810 цивили во Украина, а ранети се 20.556 од нив од почетокот на инвазијата.
Организацијата претпоставува дека бројот на цивилни жртви во реалноста е многу поголем.
Мултимедија
Најпосетени
Што треба да знаете