Протест на Албанци во Скопје на 4 мај 2012 година.
И мирни протести креваат тензии
Меѓународните преставници во Македонија не сакаат да коментираат неофицијално најавени протести на муслимани и христијани за петок и сабота, а од амбасадата на САД упатуваат на соопштението од 2 Мај на кое се повикуваат граѓаните мирно да ја следат правната процедура, а осомничените за 5 кратното убиство да добијат законски процес. Политичките партии пак, велат дека сите имаат право на протест доколку не се употребува насилство
Најавите за нови протести на муслиманите во петок и христијаните во сабота, меѓународните претставници во земјата засега не ги коментираат. Од Американската амбасада велат дека најавените протести по социјалните мрежи се се уште во доменот на шпекулациите па затоа упатуваат на соопштението од 2 мај во кое меѓудругото се вели:
Ние како партија сметаме дека правото на протест е легитимно меѓутоа СДСМ остро се спротивставува на секој обид за насилни протести.
Андреј Петров, СДСМ.
„Ќе продолжиме внимателно да ја следиме ситуацијата и, како и досега, ги повикуваме сите граѓани да останат смирени и да дозволат одвивање на правната процедура. Важно е сите осомничени за ужасните убиства - без разлика на нивниот идентитет, етничка или верска припадност - да добијат правилен процес во рамките на законот за да може на крајот правдата да биде задоволена.“
Протести на Македонци пред владата на 16 април 2012 година.
Самиот чин што има протести и од муслиманите и од христијаните покажува дека народот има гнев и народот бара правда.
Зиадин Села, ДПА.
И политичките партии посочуваат дека протестите се демократско право во секоја земја. Најголемата опозициска партија, Социјалдемократскиот сојуз, го повторува ставот дека им дава целосна поддршка на безбедносните служби за откривање на вистинските сторители на убиствата кај Смилковци. Во однос на најавените протести, генералниот секретар на оваа партија, Андреј Петров вели:
„Ние како партија сметаме дека правото на протест е легитимно меѓутоа СДСМ остро се спротивставува на секој обид за насилни протести.“
Од Демократската партија на Албанците велат дека протестите не се ништо друго освен израз на незадоволство од актуелната власт.
„Протестите како протести се демократско право на секој граѓанин. Самиот чин што има протести и од муслиманите и од христијаните покажува дека народот има гнев и народот бара правда“, изјави Зиадин Села од ДПА.
Ништо не смее да го наруши спокојот и мирното живеење на граѓаните во Македонија, без оглед на која етничка заедница припаѓаат.
Гордана Јанкулоска, министерка за внатрешни работи.
Министерката за внатрешни работи Гордана Јанкулоска вчера изјави дека МВР ги следи преписките на социјалните мрежи каде што се најавуваат протестите во Скопје, Кичево, Дебар, Струга, Гостивар и Куманово.
„Се разбира дека мора да бидеме свесни и будни за потенцијалните ризици, меѓутоа ништо не смее да го наруши спокојот и мирното живеење на граѓаните во Република Македонија, без оглед на која етничка заедница припаѓаат, без оглед на нивната верска или каква било друга определба“, изјави Јанкулоска.
Инаку минатата недела во главниот град се одржаа протести на околу илјади луѓе, претежно млади Албанци кои протестираа поради апсењата поврзани со петкратното убиство кај Смиљковци. Демонстрантите се сомневаат дека уапсените се вистинските виновници за убиството. Протестите кои беа организарани преку социјалните мрежи, а под мотото „Стоп за монтираните случаи“, поминаа без инциденти.
Марија Тумановска, родена 1981 година во Струмица. За време на студентските денови, волонтира во некои од пишаните медиуми. По завршувањето на факултетот за новинарство, станува соработник во детската редакција на Македонското радио, Радио Скопје. Подоцна работи во културниот сектор на истиот медиум. Во Радио Слободна Европа е од декември 2004 година.
