Вести
НАТО - пакет подршка за Грузија и одлука за Црна Гора
Генералниот секретар на НАТО Андерс фог Расмунсен изјави дека НАТО ќе подготви сериозна програма за Грузија со која ќе и помогне да им се приближи на стандардите на Алијансата.
Тој ова го изјави пред денешниот состанок на министрите за надворешни работи на НАТО на кој ќе уќествува и американскиот државен секретар Џон Кери.
Според Расмунсен, НАТО треба да реши до крајот на идната година дали ќе ја покани Црна Гора да стане членка на НАТО.
Расумнсен додаде и дека очекува НАТО да се согласи за пакет долгогодишни мерки за подршка на Украина.
види ги сите денешни вести
Мицкоски ја известил меѓународната заедница и ОБСЕ за изборни нерегуларности од ДУИ
Лидерот на ВМРО-ДПМНЕ, Христијан Мицкоски, тврди дека во првиот круг од претседателските избори имало нерегуларности на дел од гласачките места и за тоа ја известил меѓународната заедница и претставници на ОБСЕ/ОДИХР. Според него членови на ДУИ се вклучени во овие нерегуларности.
„Ако ме прашувате за изборните нерегуларности кои беа случај во првиот изборен круг, а за кои причина беше ДУИ, јас очекувам такво нешто да се случи и во вториот круг. Ние до претставниците на меѓународната заедница, до ОБСЕ/ОДИХР, доставивме список на избирачки места, кадешто во определен врменски интервал гласањето е во просек помалку од една минута, што наведува дека таму имаме полнење на кутии и на тие избирачки места, чудно, но вистинито, фингер-принт апаратите не работеле во тој период“,
рече Мицкоски.
Тој очекува нешто слично да се случува и во вториот круг, но вели дека овој пат се подготвени, го информиравле и МВР да ги засили своите припадници таму. Потенцираше дека сомнежите се за избирачки мета во скопски Сарај, Липково, Арачиново.
Претседателот на ВМРО-ДПМНЕ обвинува и дека ДУИ повеќе од 20 години на два начина добива гласови. Со епска манипулација и повикување на 2001 и паралелно местење тендери и второ, преку местенки, закани и поткуп.
„Ја повикувам и меѓународната заедница да не го факторизира криминалот на ДУИ, бидејќи тие сега истураат огромни количини кеш, а потоа на тој начин сакаат да бидат дел од Владата за повторно да ги вратат тие количнии кеш. Меѓународната заедница будно да го следи процесот, ова ги поминува условите во определени места во многу понеискусни демократии од македонската. Можам да кажам дека високи функцинери, дури и членови на Влада го прават ова, придружувани од припадници на МВР коишто се легитимираат кога ќе бидат фатени во процесот кога се случуваат овие притисоци и поткупи“, рече Мицкоски.
Претходно и од албанската опозициска коалиција ВЛАН обвинија за изборни нерегуларности на првиот круг од претседателските избори.
Вториот круг заедно со парламентарни избори се одржува на 8 мај.
Во црквата „Св. Спас“ одбележани 121 година од смртта на Гоце Делчев
Во црквата „Св. Спас“ во Скопје денеска со положување цвеќе пред гробот на Гоце Делчев беа одбележани 121 година од неговата смрт.
Цвеќе положија претседателот на државата Стево Пендаровски, владина делегација предводена од министерката за одбрана Славјанка Петровска и министерката за животна средина и просторно планирање Каја Шукова, собраниска делегација составена од Дарко Каевски, Даниела Николова и Велика Стојкова-Серафимовска, како и здруженија на граѓани.
Пред вечното почивалиште на Делчев се поклонија и партиска делегација на СДСМ предводена од потпретседателката на партијата Сања Лукаревска и вицепремиерот за европски прашања Бојан Маричиќ, партиска делегација на ВМРО-ДПМНЕ преводена од лидерот на партијата Христијан Мицкоски, кандидатката за претседател на државата од ВМРО-ДПМНЕ Гордана Силјановска-Давкова, министерот за внатрешни работи во техничката Влада Панче Тошковски.
Точно напладне во Собранието на Северна Македонија се доделува државната награда „Гоце Делчев“ за 2024 година за особено значајни остварувања во областа на науката. Добитници на државната награда „Гоце Делчев“ годинава се проф. д-р Роберт Хадсон и проф. д-р Иван Додовски за делото „Долга транзиција на Македонија:од независноста до Преспанскиот договор и потоа“ и д-р Ана Мартиноска и м-р Жарко Иванов за делото „Тажачки песни од скопскиот земјотрес во 1963г.“ (од архивските материјали на Васил Хаџиманов).
Годишнината од смртта на Делчев ќе биде одбележана и во Штип каде се наоѓа истоимениот државне Универзитет. Според агендата, на одбележувањето ќе се обратат ректорот на Универзитетот Дејан Мираковски и градоначалникот на Штип Иван Јорданов.
Делчев, кој пред повеќе од еден век го разбра светот како поле за културен натпревар на народите, беше убиен од османлиската војска на 4 мај 1903 година во селото Баница, на пат кон Сер. По убиството на 4 мај 1903-та, неговите посмртни останки се чувале во Баница, до 1917 година, кога биле пренесени во Ксанти, а потоа во Софија. До 1923 година, ковчежето со коските се чувало во домот на Михаил Чаков. Останките на Делчев на 11 октомври 1946 година биле пренесени во црквата „Свети Спас“ во Скопје.
За изборите на 8 мај акредитирани 1078 домашни и 770 странски набљудувачи
За вториот круг од претседателските избори и парламентарните избори на 8 мај акредитирани се вкупно 1999 набљудувачи, преведувачи и странски новинари. Најмногу акредитирани се домашни набљудувачи - 1078. Изборите ќе ги следат и 770 странски набљудувачи за чии потреби се ангажирани и 85 преведувачи. За известување од изборите, според податоците на Државната изборна комисија, акредитирани се 66 странски новинари.
Најмногу домашни набљудувачи акредитирало Здружението за развој на општествено - социјални иновации „ВАКЕ УП“ Скопје - 752, потоа Фондација Ромите за демократија - 151, Цивил - 82, Центарот за безбедносни истражувања - 46, Институтот за меѓународни односи и стратегии Охрид - 20, Националниот ромски центар Куманово - 14, Здружението за промоција и развој инклузива Куманово - 12 и Македонскиот центар за културен развој - еден набљудувач.
Специјалната мисија за проценка на изборите на ОБСЕ/ОДИХР има акредитирано 410 набљудувачи, 14 експерти и 31 преведувач, најмногу од странските набљудувачи. Парламентарното собрание на ОБСЕ (OSCE PA) има акредитирано 138 набљудувачи, Амбасадата на Соединетите американски држави во Скопје - 68 набљудувачи и 33 преведувачи, Парламентарното собрание на Советот на Европа - ад хок комисијата за набљудување на претседателските избори во Република Северна Македонија - 33 набљудувачи и 20 преведувачи, Иницијативата за дијалог и демократија Силба 30, Централната изборна комисија - Република Косово - 13, Европскиот парламент - 12 и други.
За информирање од изборите се акредитирани и 66 новинари и медиумски работници од најголемите балкански и регионални медиуми, но и од Ројтерс, Асошиејтед прес, Ал Џезира, Франс прес.
Првиот круг од претседателските избори на 24 април го набљудуваа 1601 набљудувач односно 915 домашни и 544 странски набљудувачи, како и 84 преведувачи и 58 странски новинари.
На 8 мај во земјава се одржуваат двојни избори, вториот круг од претседателските избори и парламентарните избори. На првиот круг од претседателските избори најмногу гласови освои кандидатката на ВМРО-ДПМНЕ, Гордана Сиљановска-Давкова, пред кандидатот на СДСМ и актуелен претседател, Стево Пендаровски кој се најде на второ место по освоени гласови.
На годишнината од масовното убиство во Србија медиумите да ја прекинат програмата во 22:32 часот
Во сабота, на 4 мај, ќе се наврши една година од масовното убиство во селата Мало Орашје и Дубона во Србија, кога У.Б. (21) уби девет и рани тринаесет лица.
Најмладата жртва е четиринаесетгодишниот Никола, а најстариот дваесет и петгодишниот Петар Митровиќ. Масовното убиство е извршено ден по повеќекратните убиства во основното училиште „Владислав Рибникар“ во Белград.
Никола Милиќ (14), Александар Миловановиќ (17), Марко Митровиќ (18), Лазар Миловановиќ (19), Немања Стевановиќ (21) и Петар Митровиќ (25), кои починаа во болница речиси два месеци по злосторството. Во Дубона се убиени братот и сестрата Милан (22) и Кристина Паниќ (19) и Далибор Тодоровиќ (24).
По повод годишнината од злосторството, Градот Смедерево денеска организира комеморативна програма во Мали Орашје.
Најавено е дека за време на официјалната програма ќе биде прикажан документарниот филм „Небесно друштво“ со сведоштва за животите, успесите и талентите на загинатите.
Во спомен на жртвите, на теренот во близина на местото на злосторството ќе се одигра меморијален фудбалски турнир во организација на ФК „Равни Гај“, со цел собирање помош за континуирано закрепнување на повредените.
Регулаторното тело за електронски медиуми (РЕМ) ги повика медиумите да ја прекинат програмата во 22:32 часот, кога се случи масовното убиство.
У.Б. е осомничен дека по пукањето во Мали Орашје со автомобил пристигнал во селото Дубона кај Младеновац, на десетина километри, каде ги убил полицаецот Милан Паниќ, неговата сестра Кристина Паниќ и Далибор Тодоровиќ.
Вишото јавно обвинителство Смедерево поднесе обвинителен акт против напаѓачот и тој е обвинет дека со пукање со автоматска пушка и пиштол убил девет лица, од кои двајца малолетни.
Тој се обидел да им ги одземе животите на уште 20 луѓе, од кои 12 ранил.
Во обвинението се вклучени и неговиот татко, вујко и братот на вујкото од Крагуевац.
Истрагата утврдила дека таткото на напаѓачот Радиш Б., во куќата неовластено чувал поголемо количество огнено оружје, муниција и експлозивни материјали.
Г. и Б. поголема количина оружје, муниција и експлозиви во куќата и помошната просторија.
Српскиот претседател Александар Вучиќ положи цвеќе во меморијалниот парк во Мали Орашје на местото каде пред една година загинаа шест лица, објавено е денеска на неговиот Инстаграм профил.
„Со најдлабока почит им оддавам почит на невините жртви на бесмислената кампања која зад себе остави очај, тага и пустош. Како родител чувствувам огромна болка за изгубените животи и го споделувам страдањето на семејствата кои останаа без нивното највредно богатство, без нивните деца“, напиша Вучиќ.
Тој порача дека државата нема да дозволи „злосторството да остане неказнето, победата на злото над правдата и злосторствата над човештвото“.
Венец во спомен паркот во Мали Орашје денеска положи и српскиот премиер Милош Вучевиќ.
Грузискиот премиер го брани законот за „странски агенти“
Грузискиот премиер Иракли Кобахиџе продолжува да го брани законот за „странски агенти“ што предизвика масовни протести во Тбилиси, велејќи дека е неопходно да се постигне „деполаризација“, во согласност со препораките на Европската унија.
Кобахидзе на 3 мај рече дека во разговор со претседателот на Европскиот совет, Шарл Мишел, го кажал своето разочарување што партнерите на Грузија „не сакаат да се вклучат во суштински дискусии“ за нацрт-законот и дека „сè уште не сме слушнале никакви контрааргументи против оваа предложена легислатива“.
Нацрт-законот, кој ќе бара од граѓанските организации и медиумите да даваат отчет за финансирањето од странство и да ги подложи на владин надзор, предизвика масовни протести во главниот град на Грузија.
На 3 мај, имаше големи тензии во Тбилиси при судир во кој безбедносните сили употребија сила, вклучително и гумени куршуми, за да ги разбијат демонстрантите.
Кобахиџе напиша на социјалната мрежа X, дека предложената легислатива „е единствено насочена кон промовирање на транспарентноста и одговорноста на релевантните организации во однос на грузиското општество“.
Кобахиџе, исто така, ги повтори наводите за „активна вмешаност на организации финансирани од странство во два обиди за револуции во Грузија помеѓу 2020 и 2023 година“.
Во претходен твит на 3 мај, Кобахиџе ги критикуваше Соединетите Држави, еден од најголемите поддржувачи на Грузија, дека даваат „лажни“ изјави за законот.
Кобахиџе, исто така, ја обвини поранешната американска амбасадорка во Грузија, Кели Дегнан, која беше на таа позиција од 2020 до 2023 година, како и невладините организации (НВО) финансирани од странство за наводно поддршка на два обиди за револуции.
Стејт департментот на САД не одговори веднаш на барањето за коментар.
Грузија е кандидат за членство во Европската унија и исто така побара членство во одбранбената алијанса на НАТО.
Советникот за политика на Стејт департментот на САД, Дерек Шолет, кој го повика Хобахиџе да го повлече законот за „странски агент“, на 3 мај рече дека Грузија е на точка на свртување, а нејзините евроатлански аспирации сега висат на конец.
„Сè уште има простор да се вратиме на патот што грузискиот народ го сака и заслужува“, напиша Шоле на X.
Откако беше усвоено второто читање на ревидираната легислатива на законот на 1 мај, десетици илјади демонстранти излегоа на улиците во Тбилиси, што доведе до десетици притворања и повреди меѓу демонстрантите.
Во најмалку осум случаи на 1 мај, жртвите тврдеа дека, покрај водени топови и солзавец, полицијата користела и гумени куршуми. РСЕ собра изјави на очевидци, фотографски докази за повреди, интервјуираше тројца од повредените и ги сними гумените куршуми на местото каде што, наводно, биле испукани.
Тензиите остануваат високи. Доцна на 3 мај и рано утрото на 4 мај, главната авенија Руставели во Тбилиси повторно се појави блокирана, при што некои демонстранти држат свеќи и знамиња на ЕУ и Грузија во црквата Кашвети.
Нацрт-законот е спореден со слично законодавство во Русија кое го замолчува несогласувањето и ги задушува независните медиуми и може да опфати казни за сè уште недефинирани кривични дела за невладините организации и медиумите кои не известуваат за финансирање од странство.
Третото и последно читање на предлог-законот се очекува на 17 мај.
Грузиската претседателка Саломе Зурабишвили, која се огради од политиката на владејачката партија, вети дека ќе стави вето на законот доколку тој биде формално усвоен, како што се очекуваше. Сепак, Зурабишвили рече дека партијата Грузиски сон има доволно гласови за да го отфрли нејзиното вето.
Зурабишвили го опиша нацрт-законот како „руски закон по суштина“ и рече дека владата е „склона да прави отстапки кон Русија“ и се обидува да го повтори „начинот на кој Русија успеа навистина да го потисне граѓанското општество“.
Грузија ја поднесе својата апликација за пристапување во Европската унија во март 2022 година, непосредно по целосната инвазија на Русија на Украина, која како Грузија е поранешна советска република.
Европската унија во декември официјално ѝ додели на Грузија кандидатски статус за да се приклучи на блокот. Анкетите покажаа дека поддршката за членство во ЕУ меѓу Грузијците минатата година изнесуваше речиси 90 отсто.
Најмалку шест лица се повредени во руските напади на североистокот на Украина
Најмалку шест лица се повредени во напади со руски беспилотни летала на Харков и Днипро, а погодени се и неколку трговски и станбени згради, соопштија украинските регионални власти.
Украинските воздухопловни сили објавија дека руските сили лансирале 13 беспилотни летала Шахед насочени кон области во североисточниот и централниот дел на земјата. Сите беспилотни летала се соборени, изјави командантот на воздухопловните сили.
Како што јавува Ројтерс, четири лица се повредени при падот на остатоци од дрон во Харков, а во една од зградите избувнал пожар.
Регионалниот гувернер Олех Синехубов на Телеграм изјави дека 13-годишно дете и една жена се лекуваат во болница и дека службите работат на ставање на пожарот под контрола.
Уште две лица се ранети во индустрискиот регион Дњепропетровск, изјави регионалниот гувернер Серхиј Лисак. Тој додаде дека е оштетена критична инфраструктура и три куќи.
Нападите се случија еден ден откако Украина одбележа 800 дена од почетокот на руската инвазија.
„Ова е исклучително тежок и болен пат низ кој треба да помине нашата земја, и патот што треба да помине за да се заврши војната под фер услови, во услови на Украина“, рече украинскиот претседател Володимир Зеленски на ден порано.
Руската ФСБ тврди дека ликвидирала наводен украински саботер
Руската Федерална служба за безбедност (ФСБ) во петокот (3 мај) соопшти дека нејзини офицери „ликвидирале“ агент на украинското воено разузнавање, кој наводно допатувал од Литванија за да изврши „терористички акти“ против воени и енергетски објекти во регионите на Москва и на Ленинград.
ФСБ не го откри идентитетот на „саботерот“, но рече дека тој е руски државјанин, роден во 1976 година.
Како што наведува руската служба, тој „при апсењето пружил вооружен отпор со огнено оружје и бил ликвидиран“.
Украина сè уште не излезе со коментар за овие наводи.
Полицијата ги протера пропалестинските демонстранти од Универзитетот во Њујорк
Американската полиција денеска (3 мај) ги протера студентите - пропалестински демонстранти, од Универзитетот во Њујорк по повик од претставниците на институцијата.
Ова е последна од низата полициски акции по неколкунеделните пропалестински протести во универзитетските кампуси низ САД, во кои беа уапсени речиси 2.200 луѓе.
Полицијата често интервенираше со опрема за сузбивање демонстрации – со тактички возила и шок-бомби за да се отстранат шаторите што ги поставија студентите во окупираните студентски згради.
На социјалната мрежа Икс, заменик-полицискиот комесар Каз Датри напиша дека од Универзитетот во Њујорк побарале полициска помош за разбивање на нелегален шаторски камп на имотот на Универзитетот. Тој наведе дека полицијата е на Универзитетот, а засега нема информации за евентуални апсења.
На почетокот на оваа недела, повеќе од 100 луѓе беа приведени за време на полициската акција на Универзитетот Колумбија, исто така во Њујорк, каде што започнаа протести и поставување шатори поради војната на Израел со милитантната група Хамас која САД и ЕУ ја прогласија за терористичка.
Од 18 април, агенцијата Асошиејтед Прес има регистрирано најмалку 56 случаи на апсење на 43 различни универзитети во Америка. Оваа информација се заснова на известувањата на новинската агенција, како и на изјавите од универзитетите и полицијата.
Вчера во утринските часови, полицијата дејствуваше и против толпата демонстранти на Универзитетот во Калифорнија, Лос Анџелес, каде што беа приведени најмалку 200 демонстранти бидејќи стотици одбија да ги послушаат наредбите за растерување, а некои формираа „жив ѕид“ пред полицијата.
Во акцијата, полицијата демонтирала барикади од дрво, метални огради и корпи за отпадоци, а потоа ги отстранила и шаторите.
Со протестите кои се проширија ширум универзитетските кампуси низ САД, студентите бараат универзитетите да престанат да соработуваат со Израел, но и компаниите за кои сметаат дека ја поддржуваат војната во Појасот Газа.
Израел ги осуди протестите како антисемитски, додека израелските критичари велат дека земјата ги користи ваквите обвинувања за да ги замолчи противниците.
Иако некои демонстранти со видеозаписи се забележани како даваат антисемитски изјави или имаат насилни закани, организаторите на протестот, од кои некои се Евреи, велат дека тоа е мирно движење за одбрана на палестинските права и протест против војната.
Американскиот претседател Џо Бајден во четвртокот го бранеше правото на студентите на мирни протести, но ги осуди немирите предизвикани во кампусите во последните денови.
Војната во Појасот Газа започна кога екстремистите од Хамас на 7 октомври извршија напад врз Израел при што загинаа околу 1.200 луѓе, главно цивили, покажуваат податоците од израелските власти.
Хамас киднапираше и околу 250 луѓе, од кои 100 сè уште се заробени во Појасот Газа.
Израел потоа започна офанзива на Газа во која, според Министерство за здравство, кое е под контрола на Хамас, досега загинаа повеќе од 34.500 луѓе – две третини од нив жени и деца, а ранети се повеќе од 77.800.
Рудар во БиХ затрупан 170 метри под земја, во тек е спасувачка акција
Во рудникот за лигнит „Мрамор“ кај Тузла во Босна и Херцеговина, дошло до одрони на земјиште при што е затрупан еден рудар.
„Несреќата се случи во раните утрински часови на 3 мај. Рударот беше затрупан во урнатините. Засега не успеваме да дојдеме до нашиот колега“, изјави за Радио Слободна Европа, Зухдија Токиќ, претседател на синдикатот на рудникот за јаглен „Крека“.
Според Токиќ, несреќата се случила на длабочина од повеќе од 170 метри и вели дека рударите и спасувачките единици вложуваат натчовечки напори и сите се надеваат дека ќе стигнат до рударот, како и дека тој е жив и здрав.
Министерството за внатрешни работи на кантонот Тузла соопшти дека федералниот рударски инспектор и полицијата го обезбедуваат местото на настанот.
„За се е известен дежурниот обвинител, а сите понатамошни мерки и дејствија ќе бидат преземени по наредба и под надзор на Обвинителството“, информираат од Министерството.
Ведран Лакиќ, министер за енергетика, рударство и индустрија на БиХ рече дека е во постојан контакт со раководството на рудникот и оти се на располагање за секаков вид помош со цел да се најде рударот што е можно.
Тој изјави дека разговарале и со Санел Буљубашиќ, директорот на Електропривреда БиХ, под чија надлежност е овој рудник, како и дека тој е на терен и разговара со раководството на рудникот и со спасувачкиот тим. Разговараат и со семејството на рударот за да им пружат поддршка.
Фабриката „Мрамор“ ја започна својата експлоатација во 1958 година и е еден од ретките преостанати подземни рудници за јаглен во рамките на „Крека“, најстариот рудник во Босна и Херцеговина, кој има околу 2.000 вработени.
Тој е еден од седумте рудници на територијата на Федерацијата Босна и Херцеговина.
Рудникот со години се соочуваше со финансиски проблеми. Поради неплатени даноци, сметките на рудникот во неколку наврати беа блокирани, а рударите со штрајк си ги бараа своите права.
Преминот од јаглен, чии резерви во БиХ изнесуваат околу шест милијарди тони, кон обновливи извори на енергија е голем предизвик за БиХ и услов што треба да се исполни на патот кон Европската унија.
Во ноември 2020 година, како дел од Самитот на Берлинскиот процес, Босна и Херцеговина ја потпиша Декларацијата за зелената агенда за Западен Балкан и Декларацијата за заедничкиот регионален пазар на Западен Балкан.
Декларацијата, меѓу другото, вклучува и поттикнување на данок за емисиите на јаглерод диоксид, развој на пазарни модели за поттикнување на користењето на обновливите извори на енергија, постепено укинување на субвенциите за јаглен, но и затворање на сите рудници за јаглен и термоелектрани до 2050 година.
Бајден повика на ослободување на затворените новинари
Американскиот претседател Џо Бајден повика на ослободување на сите затворени новинари, вклучително и Алсу Курмашева од Радио Слободна Европа (РСЕ) и Еван Гершкович од Волстрит журнал, кои се притворени во Русија поради обвиненија што тие, нивните работодавци и нивните поддржувачи ги отфрлаат како политички мотивирани.
„Новинарството не треба да биде криминал никаде на Земјата“, рече Бајден во изјавата по повод 3 Мај – Светскиот ден на слободата на медиумите.
„Во Русија, американските новинари Еван Гершкович и Алсу Курмашева се затворени во врска со нивната работа за Волстрит журнал и за Радио Слободна Европа/Радио Слобода“, рече Бајден.
Курмашева, новинарка од Прага на РСЕ, која има двојно американско и руско државјанство, се наоѓа во притвор во Русија од 18 октомври под обвинение за кршење на таканаречениот закон за „странски агенти“.
Станува збор за закон за кој критичарите и групите на борци за права велат дека се користи од Кремљ за сузбивање на секое несогласување.
Курмашева, која има 47 години, е обвинета и за ширење невистини за руската војска и се соочува со казна затвор до 10 години доколку биде осудена.
РСЕ и американската влада велат дека обвиненијата се одмазда за нејзината работа како новинарка во Радио Слободна Европа.
Гершкович, пак, се наоѓа во притвор од март минатата година поради обвиненијата за шпионирање кои тој и весникот жестоко ги негираат, велејќи дека 32-годишникот кога бил уапсен само си ја вршел својата работа како акредитиран известувач.
Москва се обвинува дека приведува Американци со цел потоа да ги користат за пазарење за размена на затворените Руси во САД.
„На Светскиот ден на слободата на медиумите, САД повикуваат на итно и безусловно ослободување на сите новинари кои се ставени зад решетки затоа што едноставно ја извршуваат својата работа“, рече Бајден, споменувајќи го и Остин Тајс, американски хонорарен новинар киднапиран и држен во Сирија од 2012 година.
Бајден рече дека американската администрација наскоро ќе објави конкретни чекори како одговор на неправилното притворање новинари ширум светот, нарекувајќи ја репресијата на слободата на печатот „тешка закана“ за националната безбедност на Америка.
„Ќе одобрам мерки, вклучително и санкции и забрани за визи, против оние кои преземаат дејствија за да го замолчат печатот“, рече тој.
„Денес и секој ден, ја препознаваме нивната храброст, го поддржуваме нивното право да ја вршат својата работа и стоиме со нив за слободата на печатот“.
Мултимедија
Најпосетени
Што треба да знаете