Вести
Црна Гора очекува покана за членство во НАТО
Црна Гора е дел до Акцискиот план за членство кој се смета за предворје на полноправното членство во НАТО.
Вершбоу од своја страна изнел високи оценки за напредокот на Црна Гора на планот на воените и политичките реформи и во декларацијата со Самитот на Алијансата во Чикаго, а претставува уште едно силно охрабрување на Црна Гора на патот на евроатланската интеграција.
види ги сите денешни вести
Почина главниот пропагандист на севернокорејскиот режим
Почина поранешниот севернокорејски пропагандист Ким Ки-нам, објавија утринава државните медиуми. Имаше 94 години.
„Почина од старост и оштетување на органите, за што се лекуваше од 2022 година“, објави официјалната агенција КЦНА, а пренесе Би-Би-Си.
Ким Ки-нам беше водечки пропагандист на Северна Кореја со децении, служејќи му на владејачкото семејство долго време, каде што придонесе за изградбата на култот на личноста на севернокорејските диктатори.
Севернокорејскиот лидер Ким Џонг-ун присуствуваше на неговиот погреб рано утринава и му оддаде почит на „ветеранот револуционер кој остана безгранично лојален“ на режимот, пренесе КЦНА.
Јужнокорејската новинска агенција Јонхап го спореди со шефот на пропагандата на нацистичка Германија Јозеф Гебелс.
Ким Ки-нам, кој немаше крвно сродство со владејачкото семејство, беше назначен за заменик директор на Одделот за пропаганда и агитација во Пјонгјанг во 1966 година, каде што тесно соработуваше со Ким Џонг-ил, претходникот и таткото на сегашниот лидер Ким Џонг-ун. Ким Ки-нам подоцна дојде и на чело на одделот.
Ким Ки-нам во 1970-тите бил назначен за шеф на државниот весник Родонг Синмун.
Тој со децении беше и главниот автор на политичките пароли на државата и имаше големо влијание врз нејзините медиумски и издавачки активности.
Ким Ки-нам се пензионираше во доцните 2010-ти, предавајќи ја својата улога на сестрата на Ким Џонг-ун, Ким Јо-Џонг, но продолжи да се појавува на јавни настани.
Зеленски: Русија почна масовен ракетен напад врз Украина
„На Денот на сеќавањето и победата над нацизмот во Втората светска војна, нацистичкиот Путин изврши масовен ракетен напад врз Украина“, напиша утринава украинскиот претседател Володомир Зеленски на мрежата Х.
Според Зеленски, над 50 ракети и повеќе од 20 беспилотни летала Шахед утринава ја гаѓаа инфраструктурата во областите Лавов, Виница, Киев, Полтава, Кировохрад, Запорожје и Ивано-Франковск.
„Сите неопходни служби веќе работат на ублажување на последиците од рускиот терор“, додаде тој.
„Цел свет мора да разбере кој е кој. Светот не смее да му даде шанса на новиот нацизам“, напиша Зеленски на мрежата Х.
Украина во последно време е под засилен бран на ракетни напади од руските сили. Русија ја почна инвазијата врз Украина на 24 февруари 2022 година.
Нетанјаху незадоволен од предлогот на Хамас за прекин на огнот во Газа
Израелскиот премиер Бенјамин Нетанјаху синоќа (7 мај) изјави дека не е задоволен од новиот предлог на Хамас за прекин на огнот, а Хамас, организација која САД и ЕУ ја прогасија за терористичка, предупреди дека нема да има договор доколку продолжи израелската агресија врз Појасот Газа.
Нетанјаху кажа дека новиот предлог на Хамас за прекин на огнот е далеку од основните барања на Израел, додавајќи дека сè уште е неопходен воен притисок за ослободување на заложниците што Хамас ги држи во Појасот Газа.
Израелските сили вчера рано утрината ја окупираа палестинската страна на граничниот премин во Рафа, што Нетанјаху го оцени како „многу значаен чекор кон уништување на преостанатите воени капацитети на Хамас“.
Со оваа воена операција е прекинат клучниот пат за помош до Појасот Газа, што веќе е на работ на глад.
Официјалниот претставник на Хамас, Осама Хамдан, вчера предупреди дека нема да има прекин на огнот доколку продолжи израелската агресија врз Појасот Газа.
Хамдан ова го изјави на прес-конференција во Бејрут, а делегацијата на Хамас во меѓувреме пристигна од Доха во Каиро за да ги продолжи преговорите за прекин на огнот, соопшти Хамас.
„Тврдиме дека воената операција во Рафа нема да биде пикник за (израелската) армија. Топката е во теренот на Нетанјаху“, рече Хамдан.
Тој посочи дека новиот предлог за прекин на огнот со кој се согласи Хамас е „минимумот што одговара на барањата на нивниот народ и неговиот отпор“.
МВР: Лични документи може да се подигнат денеска од 8 до 19 часот
Министерството за внатрешни работи информира дека од 8 до 19 часот денеска (8 мај) ќе работи Одделот за граѓански работи односно сите отсеци за управни работи на оваа организациска единица при МВР.
„Исто така, ги известуваме граѓаните дека сите барања за лични карти кои се поднесени до 3 мај 2024 година, се веќе изготвени и граѓаните може да ги подигнат“, информира МВР.
Граѓаните на Северна Македонија денеска гласаат на двојни избори, во втор круг од трката за претседател на државата и на парламентарни избори за нов состав на Собранието кој ќе треба да ја избере идната влада во Скопје.
Право на глас имаат над 1,8 милиони граѓани.
Кинескиот претседател Си Џинпинг пристигна во Белград
Кинескиот претседател Си Џинпинг вечерва на 7 мај пристигна во дводневна посета на Србија.
Авионот на кинескиот претседател беше придружуван од ловци МиГ-29 од моментот на влегување во воздушниот простор на Србија, а на белградскиот аеродром во негова чест беа построени гардата на војската на Србија, како и фолклорен ансамбл.
Кинескиот претседател беше пречекан од српскиот претседател Александар Вучиќ, премиерот Милош Вучевиќ и претседателката на Собранието Ана Брнабиќ.
За време на неговата втора посета на Србија во последните осум години, Си ќе се сретне со српскиот претседател Александар Вучиќ и се очекува да разговараат за широк спектар на теми – од политички, економски и технолошки, па се до меѓусебна соработка во областа на културата.
Најавено е потпишување на повеќе од 30 договори, а претставниците на двете земји посетата ја опишуваат како „јакнење на челичното пријателство“, која според нив најмногу се отсликува преку во инфраструктурната соработка, но и партнерството во политичките прашања.
Српската радио-телевизија објави дека се преземени опсежни безбедносни мерки и дека 400-члената делегација на Си ја штитат околу 3.400 припадници на безбедносните сили.
Пред Си во Белград пристигнаа членовите на кинеската делегација, министри и претставници од повеќе институции, а на аеродромот ги пречека вицепремиерот и министер за финансии Синиша Мали.
Пред доаѓањето на кинескиот претседател, Белград беше украсен со знамињата на Србија и Кина, а на рутата од аеродромот до центарот на градот беа поставени пораки за добредојде на српски и кинески јазик.
Утре пак ќе биде организиран и свечен пречек на кинеската делегација пред Палатата Србија.
На вториот ден од посетата предвидена е и билатерална средба меѓу Вучиќ и Си, средби со кинеската делегација и потпишување повеќе договори.
Русија ја стави Фридом Хаус на листата на „непожелни организации“
Руското државно обвинителство денеска на 7 мај ја прогласи за „непожелна“ во Русија невладината организација за човекови права Фридом Хаус, која има свое седиште во Вашингтон, пренесува рускиот сервис на РСЕ.
Во образложението од обвинителството, меѓу другото, стои и дека оваа одлука е донесена бидејќи „Фридом Хаус се занимава со обезбедување сеопфатна помош за украинската армија, конфискација на „замрзнатите“ руски средства во корист на Украина, како и дека врши зголемен притисок за санкции врз Русија од страна на Западот“.
Фридом Хаус е основана во 1941 година, а оваа организација повеќе од 40 години ја истражува состојбата на политичките и граѓанските слободи ширум светот.
Шефот на комисијата на Државната дума за истраги за мешање во внатрешните работи, Василиј Пискарев, на почетокот на март објави дека руските власти ќе го разгледаат прашањето за вклучувањето на Фридом Хаус на списокот на „непожелни организации“.
Пискарев ги обвини активистите за човекови права за „кампања за дискредитирање на изборите во Русија“, поради извештајот на организацијата во кој Фридом Хаус ги карактеризираше претседателските избори во Русија во 2024 година како фалсификат, потсетува Медуза.
Списокот на „непожелни организации“ постои во Русија од 2015 година. Во моментов во него се вклучени 160 субјекти. За евентуална соработка на руски фирми со организации вклучени во оваа листа предвидена е административна и кривична одговорност.
Повеќе лица уапсени во Србија и Чешка под сомнение дека се дел од криминална група
Девет лица беа уапсени на 4 мај во Србија, а едно лице два дена подоцна во Чешка поради сомнение дека се членови на организирана криминална група која се занимавала со производство и продажба на наркотични дроги, соопшти Јавното обвинителство за oрганизиран криминал во Србија денеска, 7 мај.
Според соопштението на обвинителството, на територијата на Чешка е лишен од слобода еден од организаторите на организираната криминална група - Владан Шумаревиќ.
Според српската полиција пак, тој е уапсен врз основа на меѓународна потерница од Интерпол по него распишана од страна на Србија.
Наредба за спроведување истрага е издадена против 11 осомничени, а постојат основи на сомнение дека оваа организирана криминална група во Србија произведувала и продавала дрога во периодот од 27 септември 2023 година до 4 мај 2024 година.
„Во тој период постојат основи на сомнение дека оваа организирана криминална група на територијата на Србија продала околу 172 килограми амфетамини и 10.000 таблети МДМА (екстази)“, се вели во соопштението.
При претресот пронајдена се опрема и материи наменети за производство на наркотична дрога, како и околу 50.000 евра.
Според информациите, на рочиштето на јавниот обвинител за организиран криминал, еден од организаторите Игор Шќепановиќ и еден од членовите на криминалната група Мирослав Павловиќ го признале делото.
Судот на предлог на обвинителот донесе решение за притвор за сите осомничени.
Српското Министерство за внатрешни работи на 7 мај соопшти дека осомничените се уапсени по повеќемесечната заедничка меѓународна акција наречена „Белведере“, како и дека акцијата била спроведена во соработка со полициите на Австрија, Словенија и Чешка.
„Во јануари годинава во Босна и Херцеговина е уапсен М.Т.(1990), кој е осомничен дека е еден од членовите на оваа организирана криминална група“, се вели во соопштението на српското МВР.
Според полициските информации, тие се осомничени за шверц на наркотици на територијата на Србија, Црна Гора, Босна и Херцеговина, Австрија, но и други земји од Европската Унија.
Полициски претреси кај двајца охриѓани, пронајдени фотографии од избирачки список и гласачки ливчиња
Службеници на СВР - Охрид во текот на вчерашниот ден извршиле претрес во дом и помошни простории на две лица од Охрид, а тие се осомничени дека се сторители на кривично дело злоупотреба на лични податоци и прекршоци на Изборниот законик, информираат денеска, 7 мај, од полицијата.
Според соопштението од СВР - Охрид, по претходно добиени оперативни податоци за фотографирање на избирачки список и гласачки ливчиња на првиот круг од Претседателските избори одржан на 24 минатиот месец, од судија на претходна постапка обезбедена била наредба за претрес во дом и помошни простории кај М.М.(51) од Охрид и Т.Ц.Т (44) од Охрид, и двајцата членови на избирачки одбор предложени од политичка партија.
При претресот пронајдени биле два мобилни телефони, во кои биле откриени фотографии од избирачки список со лични податоци од гласачи во избирачкиот список, фотографии од гласачки ливчиња со заокружен број испраќани од гласачи како доказ дека го дале својот глас за еден кандидат, а потоа споделени во креирана група за комуникација на мобилна апликација за комуникација.
Според соопштението, со двете лица извршен е разговор во полициска станица.
Дополнително, во текот на денешниот ден повикани се и други лица со цел обезбедување на дополнителни доказни материјали за кривичното дело по член 149 од КЗ "злоупотреба на лични податоци" и прекршок по член 190 став 2 од Изборниот законик, информираат од МВР.
По целосно документирање на случајот, ќе следуваат соодветни поднесоци.
Западен Балкан е важна транзитна зона за илегални миграции, покажа извештајот на ИОМ
Регионот на Западен Балкан е важна транзитна зона за илегални миграции, особено за оние кои се обидуваат да стигнат до Западна и Северна Европа, а Србија сè уште е главниот транзитен центар, со речиси 121.000 премини во 2022 година.
Ова е еден од наодите од Извештајот за миграцијата, кој Меѓународната организација за миграција (ИОМ) го претстави денеска на 7 мај во Бангладеш, земја која се соочува со клучни миграциски предизвици.
Според авторите на Извештајот, има значителни промени во глобалните миграциски модели, вклучувајќи рекорден број раселени лица и значително зголемување на меѓународните трансфери на пари.
Нерегуларната миграција од, кон и преку Југоисточна и Источна Европа, најчесто со помош на шверцери, претставува клучен предизвик во борбата против илегалната миграција.
Трасата на нерегуларната миграција кон Европската Унија преку Западен Балкан, поточно преку Албанија, Босна и Херцеговина и Србија, се зголемува уште од 2018 година.
„Регионот на Западен Балкан е важна транзитна зона и се карактеризира со мешан проток на миграција, особено за мигрантите кои се обидуваат да стигнат до Западна и Северна Европа. Србија сè уште е главниот транзитен центар, со речиси 121.000 вакви премини во 2022 година“, се вели во извештајот.
Во текот на минатата година во прифатните и азилантските центри во Србија биле регистрирани 108.808 мигранти, објави Комесаријатот за бегалци и миграција во годишниот јануарски извештај. Тоа е за 12 отсто помалку отколку во 2022 година.
Се прецизира дека најзастапени земји на потекло на мигрантите се Сирија (45,7 отсто), Авганистан (22,2), Мароко (6,3) и Пакистан (4,8 отсто), а меѓу нив има најмногу возрасни мажи (86,2 отсто) .
Мигрантите, по пристигнувањето во Западен Балкан, најчесто се движат низ Северна Македонија, Србија, а потоа се обидуваат да влезат во Европската Унија преку унгарската граница.
Меѓу најбројните народи кои доаѓаат на Балканот се Авганистанците, Сиријците и Пакистанците.
„Транзитниот период на мигрантите што минуваа низ Западен Балкан беше пократок во 2022 година и тие поминаа помалку денови во секоја земја во споредба со претходните години“, стои во извештајот.
Се посочува и дека земјите како Белорусија, исто така, биле транзитни зони за мигрантите кои се обидуваат да стигнат до Европската Унија во последните неколку години. Во оваа земја е забележана злоупотреба на мигрантите како политичко оружје, таканаречената „инструментализација“ на мигрантите.
Генералниот директор на ИОМ, Ејми Поуп, презентирајќи го извештајот, рече дека во свет кој се соочува со неизвесност, разбирањето на миграцијата е клучно за донесување одлуки и ефективни политички одговори.
„Светскиот извештај за миграција го унапредува тоа разбирање, ги осветлува долгорочните трендови и новите предизвици“, рече Поуп.
Во Извештајот се истакнува дека меѓународната миграција сè уште е двигател на економскиот раст.
„Ова го потврдува зголемувањето за повеќе од 650 отсто на меѓународните дознаки од 2000 до 2022 година, од 128 милијарди долари на 831 милијарди долари.
Растот продолжи и покрај предвидувањата на многу аналитичари дека овие трансфери ќе бидат значително намалени поради ковид-19.
Од вкупно 831 милијарда долари, 647 милијарди долари биле испратени од мигрантите во земјите со низок и среден приход.
„Овие износи можат да сочинуваат значителен дел од бруто домашниот производ на тие земји, а на глобално ниво ги надминуваат странските директни инвестиции во тие земји“, истакна Поуп.
Извештајот забележува дека додека меѓународната миграција продолжува да го движи човечкиот развој, а предизвиците остануваат.
„Со околу 281 милион меѓународни мигранти ширум светот, бројот на луѓе раселени поради конфликти, насилство, катастрофи и други причини се искачи на највисоко нивоа во современите податоци и изнесува 117 милиони, што укажува на итноста за решавање на кризите со раселување“, додаваат од ИОМ.
Во извештајот се нагласува и дека миграциите се составен дел од историјата.
Двојните избори ќе ги следат 1.303 домашни и 860 странски набљудувачи
Вториот круг претседателски избори и парламентарните избори утре ќе ги следат 1303 домашни набљудувачи, 860 странски набљудувачи, како и 83 странски новинари, информираше на денешната седница на Државната изборна комисија (ДИК), членот на комисијата Бобан Стојаноски.
Стојаноски информираше и дека до ДИК пристигнале барања за акредитации за набљудувачи за изборите за претседател и за изборите за пратеници, а се однесуваат на дополнување на веќе прифатени акредитации. Како што соопштија од ДИК, се работи за организацијата Вејк ап – 9 набљудувачи, ТВ Н1 од Белград со двајца новинари, Телевизија Клан Косова – 8 новинари, Амбасадата на САД дополнување со еден набљудувач, и ТВ Имеди – двајца новинари.
На денешната седница, меѓу другото, Стојаноски објасни и на кој начин граѓаните ќе можат да го остварат своето право на глас во текот на утрешниот ден.
„Гласачот го приложува документот за лична идентификација, важечка лична карта или патна исправа, односно за претседателски избори 2024 година лична карта или патна исправа чија важност истекла од 24 јули 2023 година до 24 април 2024 година, а за парламентарните избори гласачот ќе може да гласа со лична карта или со патна исправа чија важност истекла во периодот од 8 август 2023 година до 8 мај 2024 година“, рече Стојаноски.
Тој појасни дека гласачот добива два гласачки ливчиња доколку се одлучи да гласа за двата вида на избори или едно гласачко ливче за изборите за кој се одлучил да гласа и се потпишува во соодветниот извод од избирачкиот список.
„Гласачот гласа сам тајно зад гласачкиот параван. Гласачот гласањето го врши на тој начин што го заокружува редниот број пред називот, името на листата или редниот број на кандидатот со хемиско пенкало во сина боја. Превитканото гласачко ливче го става во соодветната гласачка кутија, бидејќи утре имаме двојни избори на секое избирачко место ќе има две гласачки кутии соодветно обележани. Притоа, секој гласач се задржува во избирачкото место онолку време колку што му е потребно за да го оствари своето право на глас без притоа да направи каков било застој во истото. На крај гласачот го подигнува документот за лична идентификација и го напушта гласачкото место“, додаде Стојаноски.
ДИК апелира до избирачките одбори и ОИК да продолжат да ги почитуваат законите и Изборниот законик, упатствата и правилниците донесени од страна на комисијата, со цел успешно спроведување на двојните избори кои ќе се одржат во текот на утрешниот ден.
Мултимедија
Најпосетени
Што треба да знаете