Реал Мадрид на 1 јуни го освои трофејот во Лигата на шампионите по рекорден 15-ти пат.

Титулата дојде по победата од 2-0 против Борусија Дортмунд во финалето на стадионот Вембли.

„Не можеп да се навикнеш на тоа? Никогаш“, рече Карло Анчелоти, кој го зголеми сопствениот рекорд на победи како тренер на пет титули

„Сонот продолжува“, рече тој.

Победата на Реал Мадрид дојде откако прво Дани Карвахал му донесе водство на Реал Мадрид од 1:0, потоа и Винисиус Јуниор ја запечати победата со погодок за 2:0.

Карвахал со глава погоди за Мадрид во 74. минута, а Винисиус девет минути подоцна го удвои водството на шпанскиот гигант.

Петтата титула во Лигата на шампионите за Анчелоти беше трета со Мадрид и сега тој има две повеќе од неговите најблиски ривали Зинедин Зидан, Пеп Гвардиола и Боб Пејсли.

Украинскиот претседател Володомир Зеленски на 1 јуни пристигна во Сингапур на конференцијата Шангри-Ла Дијалог.

Таму тој планира да се сретне со американскиот секретар за одбрана Лојд Остин.

Исто така Зеленски планира да се обрати пред делегатите за поддршката за неговата земја која е зафатена од војна.

По пристигнувањето на местото на конференцијата во силно обезбедување, Зеленски во изјава на платформата за социјалните медиуми Х рече дека дошол да собере поддршка од азиско-пацифичкиот регион за мировниот самит планиран за 15-16 јуни во Швајцарија.

Зеленски претходно на 31 мај потпиша договори за безбедност и соработка со Шведска, Норвешка и Исланд додека присуствуваше на третиот самит Украина-Северна Европа во Стокхолм.

Договорите беа потпишани додека руските напади и гранатирање продолжија да предизвикуваат хаос во градовите во Украина, убивајќи цивили и оштетувајќи ја инфраструктурата.

Министерот за внатрешни работи на Косово, Џељаљ Свечља, во саботата изјави дека десетици редовни и специјални униформи на српската полиција, како и делови од униформи на косовската полиција, биле пронајдени во едно село на северот на Косово.

Во објава на Фејсбук тој наведе дека врз основа на разузнавачки информации косовските власти пронашле униформи во куќа во селото Доњи Исев во општина Лепосавиќ.

Свечља не кажа кога биле пронајдени униформите и како завршиле таму.

Тој додаде дека ова е „уште еден доказ дека безбедносните механизми на Србија биле и остануваат одговорни за обидот за дестабилизација и анексија на северот на нашата земја“.

Свечља објави дека униформите биле пронајдени околу две недели откако косовската полиција повторно запленила оружје на северот на земјата.

Тензиите во северно Косово се зголемија минатата година, особено откако група вооружени Срби ја нападнаа косовската полиција во селото Бањска во Звечан, при што загинаа полициски наредник и тројца напаѓачи.

Свечља потоа по нападот рече дека Косово нашло докази дека Србија се обидела да го анектира северот на Косово и дека напаѓачите долго време се подготвувале во воените бази на српската армија внатре во Србија. Србија негираше.

Набргу по нападот, одговорноста ја презеде Милан Радоичиќ, поранешниот потпретседател на Српската листа, најголемата партија на косовските Срби која ја ужива поддршката на официјален Белград.

Тој јавно ја прифати организацијата на нападот, но се уште е на слобода бидејќи по нападот го напушти Косово.

Од нападот во Бањска, косовските власти постојано презентираа запленето оружје во северниот дел на земјата.

Грузиското опозициско Обединето национално движење денеска соопшти дека нивните простории во Тбилиси во текот на ноќта биле нападнати од десетици маскирани лица.

Од таа партија изјавија дека се искршени стаклата на канцеларијата и дека опремата е оштетена.

Грузиското Министерство за внатрешни работи за грузискиот сервис на Радио Слободна Европа изјави дека е започната истрага за нападот.

Инцидентот доаѓа во време на зголемени тензии кога владејачката партија Грузиски сон го протурка во парламентот контроверзниот закон за „странски агенти“ за кој критичарите велат дека е сличен на законодавството што се користи во Русија за задушување на опозицијата и независните медиуми.

Парламентот во кој доминираше Грузискиот сон го усвои законот и покрај повеќенеделните протести кои беа задушени од полицијата со употреба на сила. Оваа недела, парламентот го надмина ветото на претседателката Саломе Зурабишвили.

Контроверзниот закон бара граѓанското општество и медиумските организации кои добиваат повеќе од 20 отсто од своето финансирање од странски извори да подлежат на надзор кој може да вклучи санкции за сè уште недефинирани криминални дела.

Група грузиски невладини организации најавија дека ќе го оспорат законот за „странски агенти“ пред домашни и меѓународни судови.

Шестнеделните парламентарни избори во Индија, кои се гледаат како референдум еднодецениската власт на хинду националистичкиот премиер Нарендра Моди, завршија на 1 јуни додека Индијците гласаа во последната фаза од гласањето.

Изборите се сметаат за едни од најважните во историјата на Индија. Доколку Моди победи, тој ќе биде само вториот индиски лидер кој ја задржал власта во трет мандат по Џавахарлал Нехру, првиот премиер на земјата.

Во седмата фаза од гласањето во 57 изборни единици во седум држави и една сојузна територија завршија изборите за 543 места во моќниот долен дом на парламентот. Речиси 970 милиони гласачи - повеќе од 10 отсто од светското население - имаа право да избираат пратеници за петгодишен мандат.

Повеќето анкети покажуваат дека Моди и неговата партија Бхаратија Џаната (БЈП - Индиска народна партија) се пред широкиот опозициски сојуз предводен од Индискиот национален конгрес. Во вторник ќе се пребројуваат гласовите, а резултатите се очекуваат до крајот на тој ден.

Кампањата на Моди, со која тој се обидува да освои трет последователен мандат, започна на платформа на економски напредок. Тој вети дека ќе ги подигне сиромашните и ќе ја направи Индија развиена земја до 2047 година.

Сепак, во последниве недели тој ја ескалира својата поларизирачка реторика во потпалувачки говори против муслиманското малцинство, кое сочинува 14 отсто од 1,4 милијарди жители на Индија.

Кога започнаа изборите во април, се очекуваше Моди и неговата БЈП да добијат нов мандат.

Откако дојде на власт во 2014 година, Моди уживаше огромна популарност. Неговите поддржувачи го гледаат како независен, силен лидер кој го подобрил угледот на Индија во светот и дека заслуга за неговата политика е тоа што Индија стана петта по големина економија во светот.

Во исто време, за време на неговото владеење беа забележани напади и говор на омраза против малцинствата, особено муслиманите. Индиската демократија, велат неговите критичари, пропаѓа, а Моди се повеќе ја замаглува границата меѓу религијата и државата.

Како што се вжешуваше кампањата, неговата партија се соочи со силен отпор од опозициската алијанса и нејзината главна фигура, Рахул Ганди од Индискиот национален конгрес. Тие го нападнаа Моди за неговата хинду националистичка политика и се надеваат дека ќе имаат корист од зголеменото економско незадоволство.

Анкетите покажаа дека гласачите се повеќе се загрижени за невработеноста, зголемувањето на цените на храната и чувствата дека само мал дел од Индијците имаат корист и покрај брзиот економски раст под Моди, што ги прави изборите понеизвесни од очекуваното.

Во голема акција на македонската полиција на 31 мај во Скопје „за сузбивање на училно дилерство на дрога“ биле упасени 28 луѓе, соопшти Министерството за внатрешни работи МВР. Кај уапсените бил пронајден кокаин, амфетамин, марихуана, големи суми пари за кои полицијата се сомнева дека се од продавање на дрогата, како и ваги и други предмети.

Во текот на ноќта од слобода биле лишени В.Г.(46), М.В.(22) и С.Б.(21), кај кои бил пронајден кокаин, наведуваат од МВР, додека кај Д.Т.(24) од Кочани и кај С.В.(28) од Скопје при претрес биле пронајдени поголеми суми пари за кои полицијата се сомнева дека потекнуваат од продажба на дрога.

Полицијата извршила и претреси на седум локации во Скопје, по што кај Ѓ.Ш. (41) од Скопје биле пронајдени марихуана, вага и други предмети поврзани со кривичното дело, додека кај А.П.(29) бил пронајден куршум и запалка за бомба. Кај Б.П.(34) биле пронајдени остатоци од кокаин и други предмети поврзани со кривичното дело, велат од полицијата.

Од слобода биле лишени и А.Б.Ј., поради сомнение за уништување докази, како и М.Д.(37) од Скопје, кај кого бил пронајден кокаин.

При претрес кај Ф.Д.(41) од Скопје биле пронајдени поголема сума пари, марихуана, лични карти и пасоши на повеќе лица кои биле оставани како залог за купопродажба на дрога, а при преземени мерки за негово лишување од слобода, тој не застанал на издадена наредба за запирање, при што оштетил три службени возила, извршувајќи и кривично дело „спречување службено лице во вршење службено дејствие“ и за него е издаден распис за негово пронаоѓање и приведување, велат од МВР.

Покрај 28-те приведени, во текот на криминалистичката истрага биле обезбедени повеќе материјални докази за инволвираност на лицата во улична продажба на кокаин, амфетамин и марихуана, поради што за две лица веќе е поднесена кривична пријава и одредена е мерка притвор.

Полицијата одземал мотоцикл „хонда“ како и патничко возило „форд мондео“ за кое обезбедила докази дека било користено за продажба на кокаин. Во текот на денешниот ден од страна на СВР Скопје до ОЈО Скопје ќе биде поднесена кривична пријава против 7 лица, се вели во соопштението на МВР.

Истрагата треала од декември 2023 година и се спроведувала по насоки на надлежен јавен обвинител од ОЈО Скопје на 32 мај и 1 јуни 2024 година.

Во акцијата учествувале Одделот за криминалистичка полиција – Сектор за недозволена трговија со дрога, оружје и опасни материи, САЕ Тигар и СВР Скопје – Единица за недозволена трговија.

Израелските сили на 1 јуни продолжија со нападите со тенкови и артилерија врз градот Рафа во јужниот дел на Појасот Газа, неколку часа откако американскиот претседател Џо Бајден изјави дека Израел нуди нова мапа на патот до целосен прекин на огнот.

Набргу по објавата на Бајден, израелскиот премиер Бенјамин Нетанјаху инсистираше на тоа дека неговата земја ќе води војна додека не ги постигне сите свои цели, вклучително и уништување на радикалната палестинска група Хамас, која САД и ЕУ ја сметаат за терористичка организација.

Хамас досега изјави дека „позитивно го разгледува“ планот претставен од Бајден.

Во своето прво големо обраќање во кое го изложи планот за ставање крај на конфликтот, американскиот претседател рече дека понудата на Израел во три фази ќе започне со шестнеделна фаза во која израелските сили ќе се повлечат од сите населени области на Појасот Газа.

Тоа би значело и „ослободување на бројни заложници, вклучувајќи жени, постари лица, ранети, во замена за ослободување на стотици палестински затвореници“.

Израел и Палестинците потоа ќе преговараат во текот на тие шест недели за траен прекин на огнот, но примирјето ќе продолжи додека се одвиваат разговорите, рече Бајден.

Американскиот лидер го повика Хамас да ја прифати понудата на Израел.

„Време е оваа војна да заврши, да започне следниот ден“, рече тој, по што слична изјава даде и британскиот министер за надворешни работи Дејвид Камерон.

Хамас во соопштение доцна во петокот наведе дека „позитивно гледа“ на говорот на Бајден за „траен прекин на огнот, повлекување на израелските сили од Газа, реконструкција и размена на затвореници“.

Американскиот државен секретар Ентони Блинкен во петокот ги повика своите колеги од Јордан, Саудиска Арабија и Турција да извршат притисок за договор.

Генералниот секретар на ОН Антонио Гутереш „силно се надева“ дека најновите случувања „ќе доведат до договор меѓу страните за траен мир“, изјави неговиот портпарол Стефан Дујарик.

Германската министерка за надворешни работи, Аналена Баербок, рече дека понудата на Израел „нуди трошка надеж и можен излез од ќор-сокакот на војната“, додека шефицата на ЕУ Урсула фон дер Лајен го поздрави „урамнотежениот и реален“ пристап за ставање крај на крвопролевањето.

Сепак, Нетанјаху претстави различно толкување на планот претставен од Бајден во саботата, инсистирајќи дека преминот од една во друга фаза во предложениот патоказ е „условен“ и е дизајниран да му дозволи на Израел да ги задржи своите воени цели.

Нетанјаху во изјавата рече дека „го овластил преговарачкиот тим да претстави план за постигнување (враќање на заложниците), истовремено инсистирајќи дека војната нема да заврши додека не се постигнат сите цели“, кои вклучуваат уништување на војската на Хамас и управувачките способности, ослободубање на сите заложници и осигурувајќи дека Газа повеќе нема да претставува закана за Израел.

„Според предлогот, Израел ќе продолжи да инсистира на исполнување на овие услови пред да се воспостави траен прекин на огнот“, рече Нетанјаху, додавајќи дека „идејата дека Израел ќе се согласи на траен прекин на огнот пред да се исполнат овие услови е нешто за што не може да се преговара“.

Израел испрати тенкови и војници во Рафа на почетокот на мај, игнорирајќи ја загриженоста за безбедноста на раселените палестински цивили кои се засолниле во градот на границата со Египет.

Во саботата, жителите пријавија оган од тенкови во населбата Тал ал-Султан во западниот дел на Рафа, додека очевидци во источниот и центарот на Рафа опишаа интензивно артилериско гранатирање.

Израелската армија, исто така, го гранатираше и градот Газа на северот на палестинската територија, според репортерот на АФП.

Пред да започне офанзивата на Рафа, Обединетите нации соопштија дека до 1,4 милиони луѓе кои побегнале од израелските операции нашле засолниште во градот.

Оттогаш, еден милион ја напуштиле областа, соопшти агенцијата на ОН за палестински бегалци, УНРВА.

Израел го зазеде граничниот премин Рафа, дополнително забавувајќи ја спорадичната испорака на помош за 2,4 милиони жители на Газа и ефективно затворајќи ја главната излезна точка на територијата.

Светската програма за храна соопшти дека секојдневниот живот станал „апокалиптичен“ во делови од јужна Газа откако Израел започна напад врз Рафа на почетокот на мај.

Војната во Газа беше предизвикана од нападот на Хамас врз јужниот дел на Израел на 7 октомври, кога, според израелските податоци, беа убиени околу 1.200 луѓе, а дека околу 250 биле киднапирани. Во последната израелска офанзива, според тоа, убиени се најмалку 36.200 луѓе, наведуваат здравствените власти во Газа под контрола на Хамас.

Владејачкиот Африкански национален конгрес (АНЦ) во Јужна Африка е на пат да го изгуби своето парламентарно мнозинство за првпат по изборите на кои забележа неверојатен пад на поддршката за партијата под Нелсон Мандела што ја извади земјата од апартхејдот.

Со повеќе од 97 отсто преброени гласови во саботата, АНЦ освои нешто повеќе од 40 отсто од гласовите на изборите во средата. Тоа е огромен пад со оглед на тоа што АНЦ доминираше во јужноафриканската политика 30 години од крајот на владеењето на белото малцинство во 1994 година, додека во својот пик имаше 70 отсто од гласовите во најнапредната африканска економија.

Изборните претставници рекоа дека конечните резултати од изборите ќе бидат објавени до недела.

Иако АНЦ победуваше на сите претходни избори од историското гласање во 1994 година со кое беше ставен крај на владеењето на белото малцинство, поддршката за партијата се намали во изминатата деценија бидејќи Јужноафриканците гледаа како економијата стагнира, невработеноста расте и инфраструктурата се распаѓа.

АНЦ, според нецелосните резултати, сè уште има најголем дел од гласовите, но бидејќи не освои мнозинство, ќе мора да преговара за коалиција со друга партија или партии за да остане во владата. Тоа може да има реперкусии и врз иднината на јужноафриканскиот претседател Сирил Рамафоза, кој беше штитеник на Мандела.

Со тоа што пратениците го избираат претседателот, на АНЦ ќе и треба помош од други за да може Рамафоса да биде избран за втор и последен мандат.

Еден од можните коалициски партнери, новата МК партија, изјави дека еден од нејзините услови за договор е Рамафоза да биде сменет од позицијата лидер и претседател на АНЦ.

Подготвени сме да преговараме со АНЦ, но не и со АНЦ на Кирил Рамафоса“, изјави портпаролот на партијата МК, Нхламуло Ндлела.

Главната опозициска Демократска алијанса има околу 21 отсто од гласовите; Партијата МК на поранешниот претседател Џејкоб Зума има 14 отсто, а Борците за економска слобода 9 отсто. Бидејќи овие партии претставуваат многу различни идеологии, секоја од нив влегувајќи во коалиција со АНЦ може да ја сврти Јужна Африка во многу различни насоки.

Кандидат за градоначалник е убиен на 31 мај во централно Мексико, соопштија локалните власти, помалку од 48 часа пред изборите на кои беа убиени најмалку 25 кандидати.

Во соопштението на државното обвинителство во Пуебла, смртта на Хорхе Хуерта Кабрера беше потврдена во петокот попладне во градот Изукар де Матаморос, каде што тој беше кандидат.

Обвинителството соопшти дека води истрага.

Во нападот се ранети сопругата на Хуерта Кабрера и еден од неговите колеги, додаваат властите.

Тој е кандидат на партијата Зелени, која е во сојуз со владејачката партија Морена.

Кампањата за неделните избори, на кои треба да се избере нов претседател, федерални пратеници, гувернери на државите и илјадници локални функционери, беше обележана со бран напади врз кандидатите.

Федералната влада соопшти дека 22 кандидати биле убиени до вторникот, а од тогаш се пријавени уште три смртни случаи.

Некои невладини организации пријавија поголем број на убиени - до 30 убиства на кандидати од почетокот на кампањата на крајот на септември.

Борбата со картелското насилство што ги прави убиствата и киднапирањата секојдневна појава во Мексико ќе биде еден од главните предизвици со кои ќе се соочи следниот претседател, кој најверојатно ќе биде првата жена лидер во земјата.

Украинскиот претседател Володимир Зеленски на 31 мај потпиша договори за безбедност и соработка со Шведска, Норвешка и Исланд додека присуствуваше на третиот самит Украина-Северна Европа во Стокхолм.

Договорите беа потпишани додека руските напади и гранатирање продолжија да предизвикуваат хаос во градовите во Украина, убивајќи цивили и оштетувајќи ја инфраструктурата.

„Премиерот Бјарни Бенедиктсон и јас потпишавме договор за безбедносна соработка и долгорочна поддршка меѓу Украина и Исланд“, напиша Зеленски на X, поранешен Твитер.

Тој додаде дека нордиската земја ветила и најмалку 30 милиони евра финансиска поддршка за Украина до 2028 година.

Претходно, Зеленски потпиша сличен договор со Норвешка, при што членката на НАТО вети повеќе од една милијарда долари воена помош за Украина.