Средношколците денеска со марш низ скопските улици, под мотото „Борбата продолжува“ протестираат против, како што наведуваат, лошите реформи во образованието.
Маршот почна кај фонтаната во Градскиот парк, а ќе заврши пред Министерството за образование и наука.
Учениците преку маршот ги повторуваат барањата за укинување на екстерното тестирање, а нивниот Средношколски пленум да биде рамноправно вклучен доколку се изготвува нов концепт за полагање државна матура, и за какви било промени поврзани со средношколското образование.
Од Пленумот ги повикаа сите граѓани да им се приклучат на протестот и истовремено потенцираат дека станува збор за мирен марш на кој се забранува секакво насилно однесување, говор на омраза, истакнување партиски или религиозни симболи.
Од средношколскиот пленум најавија дека доколку не им бидат исполнети барањата ќе ги радикализираат протестите.