На скопскиот плоштад денеска е поставена герила акција, односно големи влечки за дома, на кои стои пораката „Седи дома“.
Зад оваа акција стои група активисти според кои уметничко активистичка акција е мотив за граѓаните да издржат во физичка изолација и да го доведат до минимум излегување во време кога „изолацијата можеби е најефикасно средство за борба против епидемијата“.
„За претстава на оваа интервенција ги избравме папучите кои претставуваат синоним за останување дома но и синоним за почитување на мерките и наредбите бидејќи во Скопскиот сленг терминот папучар најчесто се користи за некој кој безпоговорно ги следи наредбите и советите а во овие мигови сметаме дека токму тоа ни е потребно“, велат активистите.
Претходно, активистите поставија и герила акција наречена „Држете дистанца“, односно две големи раце, од кои едната беше заразена од коронавирусот.
И оваа и претходната се наменети да се охрабрат граѓаните овој период. А двете акции ги посветуваат на здравствени работници.
„Акцијата е изработена без никаков директен контакт на членовите на групата, односно е работена етапни и секвенцијално од страна на различни автори“, информираат активистите.
