Македонија, како што се чини, не може да функционира без медијатори и олеснувачи. Кога има проблеми, се разбира. Но, изгледа овој пат, „Ни САД ни ЕУ не можат да ги вразумат македонските лидери“, наслови Утрински, за да додаде: „Преговарачка агонија во Пржино“. А Нова Македонија излезе со наслов: „Хан повторно разочаран, роковите прегазени“.
Ни САД ни ЕУ не можат да ги вразумат македонските лидери.Преговарачка агонија во Пржино.Утрински весник.
Но изјавата на олеснувачот Ванхауте дека: „Нема договор, нема избори“, како што пренесе Утрински, предизвика буквално лавина од напади од провладините весници. Со голема фотографија на Белгијанецот на која е претставен како некогашниот белгискиот цар Леополд, Вечер пишува: „Белгиецот Ванхауте денеска ги укина државата и уставните институции. Тој е царот Леополд!“. Дневник, пак, наслови: „Филозоф со балкански манири - Ванхауте сам си ги одложува изборите и избира пред кои новинари ќе зборува“.
И Вечер и Дневник остро го напаѓаат и лидерот на СДСМ, Зоран Заев. Вечер во наслов кажува свое видување за неговото однесување во преговорите: „Услови, уцени, лаги, манипулации - Заев бара или негова партиска држава или ништо!“. А Дневник смета дека:„Не му е само до гласањето - Заев ја сака целата власт во министерствата, не само контрола на изборите“.
Втора најтретирана тема во печатот: „Обвинителите на Јанева повторно извисија - Аневски не го интересираат политички договори, барањето на Јанева за избор на втората половина обвинители не беше ставено на дневен ред на Советот“, наслови Утрински, а Дневник пишува: „Судир меѓу Специјалното обвинителство и Советот на обвинители - обвинителите на Јанева го бојкотираа Аневски и не дојдоа да положат заклетва“. Но затоа, Слободен печат потсетува дека Обвинителството на Зврлевски„ни да зуцне за пиштолот на Мијалков“.
Филозоф со балкански манири - Ванхауте сам си ги одложува изборите и избира пред кои новинари ќе зборува.Дневник.
Помина и средношколскиот протест против лошите образовни реформи, а „Средношколците се жалат на притисоци од страна на директорите на училиштата“ - информира само Утрински. Вечер повторно со свое видување на работите, па оди со наслов: „Пленумите продолжена рака на Сорос - СДСМ повторно ги заведе средношколците“.
Утрински потсетува дека во моментот, во најбогатите земји на ЕУ, има повеќе Македонци отколку во Битола, Прилеп и Тетово заедно, поточно над 200.000 наши граѓани што дополнително со прекуокеанските земји создава стравотна бројка дека од Македонија се иселило четвртина од населението. Главно високообразовани млади луѓе“, забележува Утрински.
И на крај, на кој до што му е: Вечер информира за „Стефчо и 550 жени во манастир“. Имено, градоначалникот на Карпош кој спред весникот многу се грижел за понежниот пол од општината им организирал излет на жените во неговиот роден крај и во манастирот Свети Јоаким Осоговски, па поиграл и оро со нив и им испеал една своја омилена српска песна. А ги почастил и со сендвичи, кроасанчиња и сокче.
