Достапни линкови

„Графиката заеднички јазик“ – на ученици од различни националности


Графика „Був“, дел од изложбата „Графиката – заеднички јазик“
Графика „Був“, дел од изложбата „Графиката – заеднички јазик“

Триесет дела, работени во линорез на тема животни, од исто толку деца-автори се претставени на изложбата „Графиката – заеднички јазик“, што во периодот од 8 до 23 јуни, се одржува во Културно информативниот центар во Скопје. Во проектот, чии потписници се „Сенсус“ и Град Скопје, овојпат учество зедоа учениците од две скопски основни училишта - „Лириа“ и „Вера Циривири – Трена“, кои твореа и меѓусебно се запознаваа под менторство на ликовнатата уметница Шќипе Мехмети.

Основната идеја ми беше да ја развиеме дружбата на децата од основните училишта од различни национални средини и воедно тие да научат нешто повеќе за графиката, за историјата на уметност, за уметниците...
Шќипе Мехмети, ликовна уметница.

Говорејќи за постановката, но уште повеќе за долгогодишната заложба, Мехмети вели дека проектот го започнала со идеја да ги запознае децата со уметноста, посебно со графиката и да се обиде преку творештвото тие да другаруваат.

Шќипе Мехмети.
Шќипе Мехмети.

„Основната идеја ми беше да ја развиеме дружбата на децата од основните училишта од различни национални средини и воедно тие да научат нешто повеќе за графиката, за историјата на уметност, за уметниците...Всушност сакав децата кои доаѓаат од различни националности да се дружат, да творат заедно...и на тој начин да ги надминат предрасудите што ги имаат од медиумите, од политиката , од дома ...едноставно од секаде“, вели Мехмети.

Само така ќе ги разбиваме предрасудите едни кон други и ќе се запознаваме. А, тоа наједноставно може треба да се прави со најмладите, со оние кои се најљубопитни и кои преку уметноста знаат едни на други најбрзо да си подадат рака.
Шќипе Мехмети.

Таа појаснува дека на почетокот основците во проектот влегуваат со резерва и со многу прашалници. Дека безмалку и да нема комуникација меѓу децата Македонци и децата Албанци. Сепак, како што вели, тоа не трае долго. Напротив.

„Брзо ги надминуваат тие бариери и на крај не само што се дружат туку и стануваат пријатели. Тоа навистина искрено ме радува, бидејќи целта на проектот е тоа – да се запознаат меѓу себе преку запознавањето на уметноста, преку изучувањето на графиката.“

Шќипе Мехмети проектот го започна пред неколку години во скопската општина Чаир. Тогаш во него беа вклученици ученици Албанци и Македонци кои посетуваа настава во едно исто училиште. Потем следуваше соработката на учениците од две различни училишта од истата локална средина, за да годинава бидат вклучени основците од две општини – Чаир и Карпош.

Нејзината идеја е тој и натаму да се развива и да опфати што повеќе деца вљубеници во уметноста од различни националности во целата држава.

„Сакам во иднина овој проект да расне. Во него да влезат што повеќе ученици од повеќе различни општини. Мојата желба е во него да се вклучат децата што ја сакаат уметноста од земјава и тој да трае повеќе време отколку што траеше досега. Само така ќе ги разбиваме предрасудите едни кон други и ќе се запознаваме. А, тоа наједноставно може треба да се прави со најмладите, со оние кои се најљубопитни и кои преку уметноста знаат едни на други најбрзо да си подадат рака.“

Инаку, графиките на уметницата Шќипе Мехмети до крајот на јуни се изложени во Галеријата на Културниот центар во Нинберг, Германија. Во меѓувреме таа го завршува и својот нов ликовен проект за кој е во недоумица каде премеирно ќе биде претставен, во земјава или надвор од неа, а извесно е и тоа дека во ноември годинава ќе патува во Њујорк, каде во Македонскиот културен центар ќе се случи нејзината нова самостојна изложба .

  • 16x9 Image

    Љупчо Јолевски

    Како новинар, водител и уредник Јолевски во новинарството е безмалку 4 децении. Кариерата ја почнал во Млад Борец на почетокот од 1980-тите. Потем долги години бил во Телевизија Скопје и во Македонското радио - Втора програма, како и во други медиуми. Во Радио Слободна Европа Јолевски е од самиот почеток на емитувањето на програмата на македонски јазик.

XS
SM
MD
LG